فى البيجو

فى البيجو .....ستشعر بالخلود ..لأن الطريق أبدا لا ينتهى

فى البيجو ....ستشعر بالاندهاش ..حيث الأجرة 5 جنيه و انت رايح و 6 جنيه و انت جاى !!!

فى البيجو ....ستشعر بالحميمية عندما يختلط عرق من بجوارك مع سعال الجالس خلفك فى مكان ما من جسدك

فى البيجو ....ستعرف معنى كلمة مطبات هوائية

فى البيجو ....لن تتضايق من التدخين ..لأن الهواء يسحب كل شئ للخارج

فى البيجو ....ستعيش التحدى ..كيف يمكن اشعال سيجارة وسط كل هذا الهواء


فى البيجو ....ممكن تعمل سيشوار لشعرك

فى البيجو ....ستقدر حالات المرضى بالتهاب المفاصل و تقوس الساقين

فى البيجو ....مستحيل ان تقوم بمكالمة تليفونية

كابتن هيما

فى بلد يتعمد قتل المواهب و باعتبار انخفاض القيمة فى مجتمع يعانى اكثر من نصفه من الفقر و الجهل و التخلف
نجد أشخاص بعينهم يحتكرون كل شئ يعملون اكثر من 7 وظائف فى حين ان هناك اكثر من 4 ملايين شاب عاطل

شخص كل مقوماته انه يمتلك زيادة من المال يعمل منتجا و لان اللعبة أعجبته يصبح كشافا للمواهب و زيادة فى التأكيد يصبح مخرجأ لكليباتهم حتى الان كل شئ الى حد ما مقبول خصوصا مع النجاح الساحق للنجوم التابعة له الراجع فى الاغلب الى كارزميتهم الخاصة بهم ..لكن الشئ الكارثى ان يقوم هذا االمنتج بكتابة الكلمات و التلحين و التوزيع و أيضا هندسة الصوت لمعظم أغانيهم و هنا نضع علامة استفهام ..هل هذا من أجل التوفير أم انها طبعة نرجسية من نوع فريد والاغرب هو خضوع النجم لكل هذا الاحتكار ...يعنى هو ناقص المنتج يغنى و يخلصنا بدل كل ده ..... المثير للسخرية ان نصر محروس ( المنتج ) قام فى اخر فيلم لتامر حسنى بكتابة القصة و هو شئ احسده على جبروته فى كتابة قصة رديئة بهذا الشكل و الادهى اخراج الفيلم باعتبار الفيلم ما هو الا كليب طويل شوية و بالطبع خرج الفيلم كجريمة سينيمائية


بعد كل هذا ..ليس الملام الوحيد ( بضم الميم ) هو نصر محروس
لكن الملام فعليا هو الجمهور الذى سيدخل الفيلم و يخرج معتبرا الفيلم رائع لانه شاهد تامر حسنى لمدة 90 دقيقة متواصلة ,

لو لم أكن كفراوياً !

حسنا هو اعتراف صغير لكن الحاجة اليه اصبحت ماسة .. دوما ع الانترنت لديك القدرة ع ان تجمل من صورتك و تخفى ما تشاء و تظهر ما تشاء ... كنت دوما اذا سألنى أحد عن مكانى كنت اجيب بلا تردد أسكندرية الا انه يجب ان اكف عن الكذب الابيض و اخبر الجميع الان و اننى من كفر الدوار و هى مدينة صناعية بالقرب من اسكندرية الا ان مظهر الامتعاض ع وجه من اخبره بتلك المعلومة دوما سبب لى شعورا بالخجل ..لم اخجل بعد الان ربم هو الشعور بالقرب من الرحيل عن اصلى و موطنى أو مجرد بعدى عنها لفترات طويلة نسبيا جعلنى اشتاق اليها

ذكريات لا تمحى ..تبديل قصص رجل المستحيل على سلالم عمارات الزقم ..عم حمدى و عربيته المتهالكة فى الصباح الباكر و اغنية حلاوة شمسنا ع الاذاعة قبل ما نروح المدرسة ..استذتى فى الفرنسيسكان اللى علمونى مع احترام الذات ..بعد كدة مدرسة صلاح سالم فى الثانوى و شقاوة النط من ع السور ..عم شفيق و الفلافل المعمولة بزيت 80 مع اللوليتا اللى بطعم الفراولة و الونها الصناعية المضروبة ... التمشية من جامع عبد المنعم رياض مع صديق عمرى لحد بيتزا ابو صبيحة نتكلم فى الفرق بين الرحبانية و عبد الوهاب و حبه لكانت و اعجابى انا بسارتر |.. الهويس و القعدة اللى تنسيك هموم الدنيا ..دورات الفيفا انا و سامى و مصكفى ..الدوخة على ماكينة تصوير فىى سيدى شحاته عشان يعقوب هو الوحدي اللى كان عنده الورق كامل .. الجنينة اللى قدام بيتنا الى كنت بشوف فيها طيور كتيرة بس خلاص راحت و بقى مكانها ابراج سكنية ... كوبرى 5 و عم ناجى بغلاسته و هو بيقول الاتوبيس ده طالع دولى مش سموحة و طبعا اوصل السكشن متأخر ..فؤاد ابو محمد و رغيف الحواوشى و بعده عصير قصب من عند الشيخ و تحس انك انبوبة جلوكوز ع وشك الانفجار ..القعدة ع سور المساعدين و مناقشة قرارات المستقبل اللى دايما بتطلع حاجة تانية خالص مش ع البال .. التمليك و بنات التمليك .. المساكن و اول مرة اخبط عربيتى هناك

... كل ده ما يخلينيش غير انى اطلب السماح من العزيزة كفر الدوار :)

كباريه السبكى فيلم

( مزة + مطرب شعبى + راقصة + كوميديان) زادت تلك العناصر أو قلت فهى الخلطة الاساسية التى تجدها فى اى فيلم يحمل بصمة السبكى فيلم ..فباعتبار خبرتهم الواسعة فى الحواوشى و سر الخلطة ..نجد انهم دوما يراهنون على ذلك السر فى افلاهم ....راجع معى على سبيل المثال افلام مثل حاحا و تفاحة . قصة الحى الشعبى ..لخمة راس ..

انها الدجاجة التى تبيض ذهبا لافلام السبكى ..لا شئ ذو قيمة فنية الا ان نجاحها ع مستوى الايرادات يثير التعجب ...الان و فجأة نجد ان السبكى يقدم فيلما جيدا ليس ب ( الناصر صلاح الدين ) الا انه فيلم يحمل رسالة ..فهل هذا بداية التحول ام مجرد تجربة عابرة ؟؟

فى كباريه هناك اكثر من مثل على تناقض ( نلاحظ فى تمثيل الكوميديانات لادوار تراجيدى و العكس ) يعيشه مجتمع مركب يحمل النقص بداخله مدعيا الفضيلة بالظاهر ..نجد بنت الحارة التى ترعى امها نهارا الراقصة ليلا ..من يمسك بيديه الاف الجنيهات يوميا و لا يجد لابنته مصاريف المدرسة ( اقوى تيمة فى الفيلم ) ..اكثر من تناقض بعضها جاء سخيفا مثل فؤاد حامد ( لاحظ الاسم ) مدير الكباريه الذى ورثه عن ابيه ( راجع فيلم العار ) و يديره بكفاءة الا انه لا يفوت فرض و يستعد للعمرة !ّ!

برغم الملاحظات القادمة ..احب الفت الانتباه ان الفيلم جيد و يستحق المشاهدة و لن تمل من الفرجة عليه عكس معظم افلام السينما الفترة اللى فاتت و تقييمى الشخصى له 7/10


هذه عدة ملاحظات ع فيلم كباريه كتبتها بسرعة بعد خروجى من السينما

• قصة محمد شرف كانت تحتاج الى تركيز ومساحة اكبر ..
• محمد لطفى لم يكن واضح بسبب بحة صوته و كان من الممكن اختيار عاهة اخرى
• لم أصبح محمود الجندى فجأة هو سفير الاصولية فى السينما المصرية ..هذا رابع فيلم اراه يحث فيه ع القتل مع اختلاف المبرر
• موسيقى تامر كروان معبرة بسلاسة عما يريده الفيلم وهو افضل عنصر موجود فيه
• المونتاج كان زى الزفت ,...قطع فى نص اللقطات و كتير بتاخد وقت عبال ما تعرف انت فين و مع مين
• فكرة ان الاحداث بتتم فى يوم واحد ما بانتش قوى و كان ممكن تقريبها بشكل افضل
  
• اخر حاجة فى احدى الحاورات بين الارهابى و امير الجماعة بيقوله جملة استفزتنى جدا ( الضرورات تبيح المحظورات
  ) فجأة بقى الارهابيين بيتبعوا كتاب الامير لمكيافيللى .. بس بعد مراجعة النفس لقيت العيب مش ع صناع الفيلم فى بلد ممكن بسهولة تقنع 90 % منه ان الجملة دى حديث شريف !!!!
  

ليه بسمع منير ؟؟

سؤال غريب مش كدة ..بس لاحظته فى احدى الكويز الموجودة فى الفيس بوك ..بس لو جيت اجاوب سؤال زى ده مش هعرف ابدأ منين فصوت منير من اهم مفردات عالمى الخاص جدا فلا يمر موقف الا واجد صوته ينبعث بأغنية ملائمة لما يحدث ..فبداية يومى استيقظ على ( المهنة بناضل بتعلم ..تلميذ فى مدرسة شعبية ) كى أنزل الى الحياة فمازال أمامى الكثير لأتعلمه ...أما عندما تبدا سحابة الكأبة المعتادة فى ان تلوح ( الدنيا لو جارحة لونها هنا و فرحة .ما هو ايخ بيطول عمر الواحد غير الفرحة ) فتنتهى تلك الغمامة فورا ..دوما أضع نصب عينى ( الفرصة بنت جميلة راكبة عجلة ببدال ..العاقل لو يلحقها يتبدل به الحال ) و لما احب اهرب من المشاكل اطلع بالعربية و اسمع ( لو تاه المرسى ..راح نرسى فى مينا . و يا مراكبى شد القلوع يا مراكبى ) و طبعا لو بطلت احلم أموت عشان هى رقصة شهية هى الحياة فيها العشوقية و المعشقة ..و طبعا شعارى لما احس باحباط انه لا انهزام ولا انكسار و لا خوف و لا حلم نابت فى الخلا ولو فى يوم راح انكسر لازم اقوم واقف كما النخل باصص للسما ..كمان انا بكره الشتا عشان كدة تلقينى بعلق حلمى ع الشماعة و الف لحاف الشتا من البرد و لو عرفتنى اكتر دايما تلاقينى بهرب من بيوت الحزن و اسكن بيوت الفرح و لما احب ببقى عارف انه لما النسيم يعدى بين شعرها أصرخ و املا الكون اهت و ان صوتها ارق من النيات و بحسد كل حاجة تحس بها و كمان عينيه الحلوين اللى احلى حاجة شفتها العين هى , و لما بحس بخنقة فى صدرى يبقى اكيد هفتكر ان البيت بيضيق و يضيق لكن انا قلبى براح
و فى النهاية أحب اقولك ان لو حد عايز قلب فاضى قلب طيب قلب هادى فأكيد أكيد لازم تسمع منير :))